निधारमा
एक चम्किलो तारा
एक दशक बढी पहिरिएर
मेरा बा
अमन्यु दमाईले
राखेका थिए मेरो नाम; जनयुद्ध
अहिले, म तीस वर्षको हुन लाग्दा पनि
अहँ ! केही बदलिएन –
म गरिबको गरिबै रहेँ
अछुतको अछुतै रहेँ

भर्खरै आरनबाट निकालेका हुन्
मानौँ बा’का आँखाहरू
रापले छट्पटिएको मुद्रामा
बा’ले भन्नुभयो;
तेरी आमाको पेटमा हुर्किरहेकी
तेरी बहिनीको नाम
अब
छिट्टै –
क्रान्ति राख्ने हो !

यसपालि क्रान्ति
उत्तराको गर्भ चिर्दै,
अश्वत्थामाको ब्रह्मास्त्र निल्दै जन्मिनेछिन् !

धनगढी उपमहानगरपालिका १३, राजपुर, कैलाली